I samsvar med Plan- og bygningslova § 12-8 og § 12-14, vert det varsla om oppstart av planarbeid for endring av Detaljreguleringsplan for Via Ferrata Hornelen, datert 26.02.2019, PlanID: 1438.2016.01, I Bremanger kommune. Formålet med planarbeidet er å sikre at etablert Via Ferrata skal kunne stengast for allmenn bruk, for og ivareta tryggleiken til brukarane av anlegget. Føremålet er også å sikre heimel for evt. nye tiltak tilknytt anlegget, og ei tenleg vidare drift av Via Ferrata-anlegget.
For å sikre faglege råd og tydeleg tilbakemelding frå ulike faginstansar tidleg i planarbeidet, vert det i varsel til planarbeidet gjeve ei grundig skildring av planlagde endringar og arealformål som er tenkt nytta i forslag til endring av eksisterande reguleringsplan for området.

Forslagsstillar er Bremanger kommune, plankonsulent er iVest Consult AS.
Det har vært fleire møte med Bremanger kommune i oppstartsfase for endring av plan.
Endringsplanen har fått nemninga Reguleringsendring Via Ferrata Hornelen, PlanID 4648.202401.

Aktuelt planområde for endring omfattar i hovudsak areal innanfor eksisterande reguleringsplan, der arealet er avsett til LNFR formål kombinert med andre angitte hovudformål (5900), F/VF/LNF, då angitt som friluftsområde, Via Ferrata anlegg kombinert med LNF-formål.
Videre skal reguleringsplanarbeidet inkludere sjøareal i tilknyting til strandsone rundt Hornelsneset for å legge til rette for etablering av flytebrygge knytt til drift av anlegget. Det er kun tenkt etablering av eit mindre flytebryggeanlegg, men heile strandsona langs planområde er inkludert for å kunne vurdere best egna lokalitet for plassering av flytebrygge. Planområdet er omlag 500 daa og kan verte justert i planprosessen.

Gjeldande plan, og behov for endring
Eksisterande detaljreguleringsplan for Via Ferrata Hornelen legg til rette for etablering av Via Ferrata anlegg innanfor areal avsett til kombinert formål for friluftsliv, Via Ferrata og LNF (landbruks-, natur- og friluftslivsføremål). I gjeldande plan var det i utgangspunktet planlagt å etablere anlegget som eit ope anlegg, der ein i driftsfase, -som eit avbøtande tiltak, kunne vurdere behov for lukking av anlegg i høve risiko og tryggleik. I ROS-analysen, hending 15: Anlegg/verksemd som kan ha ein risiko – Via Ferrata, går det fram at; «Det at ruta er open for alle kan utgjere ein risiko ved at det kan lokke uerfarne ut på tur, noko som kan føre til fleire skadar. For vurdering av risiko vil det sannsynlegvis vere størst risiko ved eit ope Via Ferrata-anlegg.» På bakgrunn av dette vart det som avbøtande tiltak vist til vurdering av krav om guide til alle som ikkje minimum kan viser til NKF sitt Brattkort (https://klatring.no/sikkerhet/brattkort/), og å evt. «lukke» VF-anlegget slik at ein berre kan klatre med guide. I driftsfasen har det vist seg at anlegget bør fysisk stengast, for å sikre tryggleiken til brukarane. Slik reguleringsplanen er utforma, legg den ikkje godt nok til rette for dette, og den må difor endrast.

Planlagd endring
I forslag til endra plan er LNF-formål kombinert med andre angitte hovudformål (5900), tenkt endra til Anna idrettsanlegg (1490) då arealformålet er vurdert å vere eigna for og heimle kommersiell drift og stenging av anlegget. Endringa vil såleis omfatte både plankart og føresegner innanfor aktuelt område.

Innanfor områda F/VF/LNF, dvs. området for VF i gjeldande reguleringsplan, heimlar planen at det kan «tilretteleggast for etablering av VF-anlegg med tilhøyrande turstiar. VF- anlegg skal utformast med omsyn til området som naturområde. Bruk av trapper og bruer bør kun nyttast der dette er naudsynt.» I samband med søknad om byggjeløyve for VF-anlegget er det gjeve løyve til gapahukar, biotoalett, i tillegg til sjølve VF-anlegget, turstiar og trapper. Dette er tiltak ein har vurdert til å vere i samsvar med plan. I samband med planendringa er det ønskjeleg å endre føresegnene, for å spesifisere nærare kva tiltak som kan gjevast løyve til, inklusive anlegg for stenging av VF. Det kan vere aktuelt med andre nye tiltak, som til dømes delstrekningar med VF, ekstra gapahuk, flytebryggje og zipline.

Tilkomsten til starten av VF-anlegget er ein 2 km lang sti i vanskeleg terreng, frå parkeringsplassen på Hornskor og fram til VF. Det er difor ønskje om ei mindre flytebryggje for å kunne kome til VF med småbåt/rib. Planområdet er derfor utvida til å omfatte ei sone langs deler av sjølina, med ca. 30 m breidde for og kunne vurdere best egna plassering for flytebryggje og ilandstiging.

Med omsyn til friluftsliv vert det vurdert at etablering av VF-anlegget med tilhøyrande opparbeidd sti og trapper, fremjar friluftsliv for ålmenta, ved å gjere det som tidlegare har vore eit nokså utilgjengeleg område tilgjengeleg for fleire. Ei stenging av anlegget vil ikkje endre tilgjenge, då erfarne klatrarar som er kompetente til å klatre Hornelen vil kunne klatre fritt i fjellpartiet og krysse Via Ferrata traseen, men då utan å kople seg på det etablerte Via Ferrata-anlegget.
Ei stenging av sjølve Via Ferrata-anlegget vil måtte kunne etablerast med fysiske installasjonar, på fleire aktuelle punkt i anlegget. Resterande etablert anlegg i tilknyting til VF-anlegget, slik som opparbeidde stiar, trapper, gapahuk og toalettfasilitetar, som ikkje gir konflikt i høve tryggleik, vil kunne nyttast fritt av alle. Eksisterande og eventuelle framtidige merka turstiar til toppen av Hornelen, turveg frå Hornskår med sherpatrapper, og deler av Via Ferrata-anlegget er såleis ikkje omfatta av ei lukking av anlegget.
Førebels forslag til plankart og forslag til endring i føresegner er lagt ved varselet som vedlegg for å sikre konkrete tilbakemeldingar til det vidare planarbeidet.

Utgreiingsbehov og vurdering av om planen er omfatta forskrift om konsekvensutgreiing
Det vert vurdert at aktuell endring av eksisterande plan ikkje vil gå vesentleg ut over det som var intensjon i gjeldande plan, då det i ROS-analysen til planen var foreslått som avbøtande tiltak å vurdere og lukke anlegget for å ivareta tryggleiken dersom dette viste seg naudsynt ved drift av det etablerte VF-anlegget. Via Ferrata-anlegget er etablert, og endring av planformål for å kunne heimle stenging av deler av anlegget vil såleis berre medføre mindre fysiske endringar. Eventuelle tilleggsinstallasjonar som planendringa vil opne for, vil ha svært avgrensa omfang.
Planarbeidet er ikkje omfatta av kravet om konsekvensutgreiing i forskrift om konsekvensutredninger §6, vedlegg I. Vidare er det vurdert at planendringa ikkje fell inn under tiltak i vedlegg 2, og at tiltaka ikkje vil føre med seg vesentleg verknad for miljø eller samfunn etter forskrifta §10. Planen fell då heller ikkje inn under forskrifta §8. Planarbeidet er på dette grunnlag vurdert å ikkje utløyse krav om konsekvensutgreiing (KU).

Medverknad
Fagmynde, grunneigarar/naboar mfl. vert inviterte til å kome med innspel gjennom varsling og kunngjering av planoppstart. Det vert lagt opp til dialog og avklaringar med aktuelle fagmynde undervegs i planprosessen etter behov.

Planprosess
Etter mottekne innspel til dette planoppstartvarselet, vil alle innspela bli gjennomgått og vurderte, før utarbeiding av eit komplett planframlegg. Planframlegget blir behandla i formannskapet, før offentleg ettersyn i ca. 6 veker. Innkomne merknader vert deretter handsama i formannskapet, og vidare planprosess, før endeleg vedtak i kommunestyret er avhengig av innkomne merknader og evt. motsegner.

Kunngjering og høyringsfrist
Planarbeid vart kunngjort i avisa Fjordenes Tidende 20.02.2025. Naboar/Partar er tilskrive med eige brev.
Dei som har innspel, merknader eller spørsmål til planarbeidet kan vende seg til iVest Consult as, innan 20.03.2025.