I samsvar med Plan- og bygningslova, plandelen § 12-8, vert det varsla om oppstart av planarbeid etter § 12-3 – Offentleg detaljreguleringsplan for Keilevågen, gbnr 28/595 m.fl., tilkomstveg til kystmuseet, i Kinn kommune. PlanID 20250001.

Tiltakshavar for detaljreguleringa er Kinn kommune, Teknisk Florø v/Anders Espeset og Frode Ellingsund. Plankonsulent er iVest Consult AS.

Planarbeidet vil skje i tett samarbeid med Musea i Sogn og Fjordane v/Annette Langedal Holme.

Formål/Bakgrunn for planarbeidet

Formål med planarbeidet er å legge til rette for ny tilkomstveg til Kystmuseet i samsvar med føringar gjeve i kommunedelplanen for Florelandet-Brandsøy.

I tillegg til vegtilkomst, skal det vurderast areal for parkeringsplass, nærmiljøanlegg, turveg og areal for etablering av kommunalt pumpehus. Varsla planområde utgjer om lag 32 daa, der planområdet kan verte justert i planprosessen. Sjå vedlagd planinitiativ for detaljar. 

Utgreiingsbehov og vurdering i høve forskrift om konsekvensutgreiing

Det vart gjennomført oppstartsmøte med Kinn kommune den 11.02.2025, der kommunen tilrår oppstart av planarbeid. Tema som skal vurderast særskilt i planarbeidet er blant anna: Landskap, estetikk og naturmangfald, friluftsliv, strandsona, teknisk infrastruktur, trafikktryggleik, universell utforming, folkehelse, barn og unge, kulturmiljø, m.fl. Verknad av desse vil bli vurdert i planomtalen. Det vart vidare avklart at det skal gjennomførast biologisk kartlegging i planprosessen.

I følgje KU-forskrifta § 4-2 ledd, skal den som fremjar forslag til plan etter plan og bygningslova sjølv vurdere om planen fell inn under forskrifta sitt saklege verkeområde. Formål med planarbeidet, og forslag til planformål, er vurdert å samsvare med overordna plan, og fell såleis ikkje inn under Forskrift om konsekvensutgreiingar §6, vedlegg 1. Planen gjeld tiltak etter plan- og bygningslova, og fell såleis heller ikkje inn under forskrifta §7. Vidare er det vurdert at plantiltak ikkje fell inn under vedlegg 2, at tiltaka ikkje vil føre med seg vesentleg verknad for miljø eller samfunn etter forskrifta §10, og at planen då heller ikkje fell inn under forskrifta §8. Planarbeidet er på dette grunnlag vurdert å ikkje falle inn under forskriftas saklege verkeområde, og dermed heller ikkje utløyse krav om konsekvensutgreiing (KU).

Kunngjering

Planarbeidet blir kunngjort i avisa Firdaposten den 27.02.2025. I tillegg vert annonse med oversiktskart og planavgrensing, samt planinitiativ og referat frå oppstartsmøte lagt ut på Kinn kommune sine nettsider: www.kinn.kommune.no og iVest Consult AS sine nettsider www.ivestconsult.no.