I samsvar med Plan- og bygningslova, plandelen § 12-8 og §12-14, 2. og 3. ledd, vert det varsla om oppstart av planarbeid etter § 12-3 – privat forslag til detaljreguleringsplan. Aktuelt planområde omfattar gbnr 23/8, 23/303-312, og del av 23/3, lokalisert på sørsida av Brandsøyåsen, i Kinn kommune. Varsla planområde utgjer om lag 31 daa, der endeleg planavgrensing kan verte justert i planprosessen.

Tiltakshavar for planarbeidet er grunneigarar Ullaland Bygg og Eigedomsutvikling AS og Odd Birkeland.
Plankonsulent er iVest Consult AS.

Formål med planarbeidet

Formål med planarbeidet er å auke utnyttingsgrad i bustadfelt innanfor eksisterande reguleringsplan Privat detaljreguleringsplan – Brandsøy – Slettevoll, Gbnr.23/3, Bustad (datert 04.11.2014, PlanID 20080119), for å legge til rette for at det i tillegg til einebustader, kan førast opp tomanns-/fleirmannsbustader med garasje/garasjeanlegg innanfor området. Planarbeidet skal også legge til rette for utviding av bustadfeltet vestover med felles tilkomst frå etablert tilkomstveg i aust, og regulere inn areal som sikrar «ein hjortekorridor» mellom sjø og etablerte hjortetråkk i Brandsøyåsen.
Planarbeidet skal vidare legge til rette for friområde langs sjø, og sikre ålmenta tilgang til sjø langs heile strandsona innanfor varsla planområde.
Ny reguleringsplan vil såleis legge til rette for arealeffektiv bustadutbygging i område med etablert infrastruktur, der bebuarar vil ha umiddelbar nærleik til sjø, natur og friområde, samstundes som nytt bustadfelt vert etablert i nær tilknyting til sosial infrastruktur som skule, barnehage og etablert nærmiljøanlegg.

Historikk og planprosess
Det vart oppretta dialog med Kinn kommune vår/sommar 2023 vedrørande ynskje om endring for å auke utnyttingsgrada og justering av formålslinjer innanfor gjeldande privat detaljreguleringsplan for Brandsøy – Slettevoll, Gbnr.23/3, Bustad (PlanID 20080119). I dialog med kommunen vart det frå kommunen tatt initiativ om at planarbeidet også kunne omfatte endring av eldre reguleringsplan for Brandsøy, del av gbnr 23/8, Bustadområde (planID 140119890108). Dette for å legge til rette for og regulere inn areal som sikrar «ein hjortekorridor» mellom sjø og etablerte hjortetråkk i Brandsøyåsen. I overordna plan kommunedelplan for Florelandet Brandsøy er det ikkje sett av nok areal til å sikre ein slik korridor, og kommunen såg det derfor som formålstenleg å inkludere tilgrensande eldre plan for å sikre dette.
Det vart gjennomført oppstartsmøte med planavdelinga den 06. Juli 2023. Det vart der tilrådd å sette i gang planarbeid for endring av aktuelle reguleringsplanar der planarbeid skulle handsamast etter reglane for forenkla prosess §12-14, 2. og 3. ledd. I referat frå oppstartsmøtet framgår det at formål med planarbeidet var;

• Auke utnyttingsgrad for bustadfelt med moglegheit for etablering av tomanns-/ fleirmanns-bustader med garasje/garasjeanlegg innanfor PlanID 20080119
• Vidareføre veg i aust fram til bustadtomter innanfor planID 19890108
• Legge til rette for hjortekorridor og omdisponering av regulert veg og bustadareal innanfor planID 19890108

21. august 2023 vart det varsla opphøyring av reguleringsplan (planID: 140119890108) – som det også vart søkt endring om. At aktuell plan som det i oppstartsmøte vart tilrådd endring av, også var føreslått oppheva vart ikkje fanga opp av kommune eller grunneigar, og forslag til vedtak vart derfor politisk behandla i Plan- og miljøutvalet (sak 068/23) og i Kommunestyret (sak 157/23), der planen vart vedtatt oppheva i sin heilheit.

I møte med kommunen i etterkant av dette, vert det frå kommunen si side foreslått som løysing å varsle oppstart av planarbeid i samsvar med Plan- og bygningslova, plandelen § 12-8, men der ferdig planforslag kan bli aktuell å behandle etter ein forenkla prosess. Det vart då vist til formålet med planarbeidet som er å sikre hjortetråkk innanfor område avsett til bustadformål i KDP, at planlagde tiltak ikkje vil påverke gjennomføringa av planen forøvrig, ikkje går utover hovudrammene i planen, og heller ikkje berører viktige natur- og friluftsområde, samt planavdelinga si tilråding for oppstart av planarbeidet som vart gjeve i oppstartsmøte i juli 2023. Etter oppstartsvarsling og utarbeiding av planforslag vil planforslaget då verte førelagd aktuelle offentlege mynde og grunneigarar i planområdet før avgjerd. Jfr. pbl §12-14, 2-3. ledd.

Arealformål i overordna plan og gjeldande reguleringsplan

Aktuelt område inngår i eksisterande kommunedelplan for Florelandet Brandsøy (Planid: 20200001). Vestre del av planområdet er avsett til bustadformål, noverande, område B24. For austre del er området avsett til Kombinert bebyggelse og anleggsformål, noverande, område BKB24, Andre typer bebyggelse og anlegg (offentleg teknisk anlegg), område BAB5, i tillegg til tilgrensande areal avsett til Grav- og urnelund, noverande og framtidig, område BGU og BG. I nord er areal avsett til vegformål med omsynssone for støy, gul sone, H220_2. Mot sjø er areal avsett til LNF-formål med omsynssone for flaum, H320. I sjø er areal avsett til Bruk og vern av sjø og vassdrag med tilhøyrande strandsone, område V. I strandsona, mellom LNF-område og sjøareal, er det registrert kulturminne med omsynssone Båndlegging etter lov om kulturminne, H730_11.
Det har i dialog med kommunen vorte avklara at byggegrense mot sjø kan følgje formålsgrensa i kommunedelplan for område B24 og BKB24.

Austre del av planområdet er omfatta av privat detaljreguleringsplan – Brandsøy – Slettevoll, Gbnr.23/3, Bustad, kor området er avsett til Bustad med tilhøyrande tilkomstveg, samt friluftsformål og friluftsområde i sjø og vassdrag. I strandsona er det også i reguleringsplan avsett eit område for Båndlegging etter lov om kulturminner, H730_1. Denne vert endra som del av planarbeidet, der endring i hovudsak er knytt til auka utnyttingsgrad og justering av formålsgrenser.

Mot nord grensar planområdet til eldre reguleringsplan Brandsøy, fv. 548, Gang- og sykkelveg, 21.06.2005, PlanID: 140120050103. Denne vert berørt ved innregulering av oppdaterte siktsoner i etablert avkøyrsle i aust.

I vest grensar området mot eldre reguleringsplan Solbakkestranda (plassen), datert 17.02.2002, planID: 140120020107. Denne vert ikkje berørt av aktuell reguleringsplan.

Utgreiingsbehov og vurdering av om planen er omfatta forskrift om konsekvensutgreiing
I oppstartsmøte vart det avklara tema som vil bli nærare vurdert i planarbeidet t.d: Landskap og estetikk, miljøfaglege tilhøve, naturmangfald m.fl.

Formål med planarbeidet, og forslag til planformål, er vurdert å samsvare med overordna plan, og fell såleis ikkje inn under forskrifta §6, vedlegg 1. Plan gjeld tiltak etter plan- og bygningslova, og fell såleis heller ikkje inn under forskrifta §7. Planen gjeld tiltak etter plan- og bygningslova, og fell såleis heller ikkje inn under forskrifta §7. Vidare er det vurdert at plantiltak ikkje fell inn under vedlegg 2, at tiltaka ikkje vil føre med seg vesentleg verknad for miljø eller samfunn etter forskrifta §10, og at planen då heller ikkje fell inn under forskrifta §8.
Planarbeidet blir med dette som grunnlag vurdert å ikkje falle inn under forskriftas saklege verkeområde, og dermed heller ikkje utløyse krav om konsekvensutgreiing (KU).

Medverknad:
Fagmynde, grunneigarar/naboar mfl. vert inviterte til å kome med innspel gjennom varsling og kunngjering av planoppstart. Det vert lagt opp til dialog og avklaringar med aktuelle fagmynde undervegs i planprosessen etter behov.

Kunngjering og høyringsfrist:
Planarbeidet blir kunngjort i avisa Firdaposten 27.02.2025. I tillegg vert annonse med oversiktskart og planavgrensing og referat frå oppstartsmøte lagt ut på kinn kommune sine nettsider: www.kinn.kommune.no og iVest Consult as sine nettsider www.ivestconsult.no.